राम्रो मिडिया ग्रुप / सम्पादकीय
काठमाडौं । नेपाल आयल निगमका कार्यकारी निर्देशक चण्डिका प्रसाद भट्टले आफ्नो पदबाट राजीनामा दिएका छन् । उनले बुधबार उद्योग, वाणिज्य तथा आपूर्ति मन्त्रालयमा पुगेर आफ्नो राजीनामा पत्र बुझाएका हुन् ।
उद्योग, वाणिज्य तथा आपूर्ति मन्त्रालयका प्रवक्ता नेत्र प्रसाद सुवेदीले भट्टले राजीनामा दिएको औपचारिक पुष्टि गरेका छन् । मन्त्रालयले राजीनामा स्वीकृतिको प्रक्रिया अघि बढेको जानकारी दिए पनि उनको बहिर्गमनको ठोस कारणबारे भने अहिलेसम्म केही खुलाइएको छैन ।
भट्टको राजीनामासँगै नेपाल आयल निगमको भावी नेतृत्वलाई लिएर विभिन्न क्षेत्रमा चासो र चर्चा सुरु भएको छ । इन्धन व्यवस्थापन जस्तो महत्वपूर्ण जिम्मेवारी सम्हालिरहेको संस्थामा कार्यकारी पद रिक्त भएपछि अबको नेतृत्व कसले सम्हाल्छ भन्ने विषय प्राथमिकतामा परेको छ ।
मन्त्रालयले अब नयाँ कार्यकारी निर्देशक चयनका लागि आवश्यक प्रक्रिया र मापदण्डबारे छिट्टै निर्णय गर्ने अपेक्षा गरिएको छ । नयाँ नेतृत्व नआउन्जेलसम्मका लागि निगमको दैनिक कार्यसम्पादन कसरी अगाडि बढ्छ भन्ने विषयमा पनि मन्त्रालयले गृहकार्य गरिरहेको बुझिएको छ ।
