राम्रो मिडिया ग्रुप / सम्पादकीय
काठमाडौं । सरकारले मुलुकको मुख्य प्रशासनिक केन्द्र सिंहदरबार परिसरको परिमार्जित गुरुयोजना स्वीकृत गर्ने निर्णय गरेको छ ।
सोमबार बसेको मन्त्रिपरिषद् बैठकले सिंहदरबारको आन्तरिक संरचनालाई थप व्यवस्थित र आधुनिक बनाउने उद्देश्यका साथ उक्त गुरुयोजना पारित गरेको हो ।
परिमार्जित गुरुयोजनामा विशेषगरी सिंहदरबारभित्रको आन्तरिक व्यवस्थापन, सुरक्षा संवेदनशीलता र संघीय संसद् भवन परिसरको प्रवेश प्रक्रियालाई सहज बनाउने विषयहरूलाई प्राथमिकता दिइएको छ । सिंहदरबारभित्रका विभिन्न प्रशासनिक कार्यालयहरूको कार्यसम्पादनलाई व्यवस्थित तुल्याउन भौतिक संरचनामा सुधार गर्ने सरकारको योजना छ ।
मन्त्रिपरिषद्को बैठकपछि सञ्चारकर्मीहरूसँग कुरा गर्दै सरकारका प्रवक्ता सस्मित पोखरेलले सिंहदरबारभित्रको वातावरणलाई थप मर्यादित र पहुँचयोग्य बनाउन नयाँ गुरुयोजना ल्याइएको जानकारी दिनुभयो । उहाँका अनुसार सिंहदरबार परिसरभित्रका आन्तरिक पक्षहरूलाई व्यवस्थापन गर्न र विशेषगरी संसद् भवनतर्फको प्रवेशलाई सहजीकरण गर्न यो गुरुयोजनाले मार्गप्रशस्त गर्नेछ ।
मन्त्री पोखरेलले गुरुयोजना स्वीकृत भएको जानकारी दिए तापनि यसभित्र समेटिएका अन्य विस्तृत प्राविधिक र संरचनागत विषयहरूका बारेमा भने स्पष्ट खुलाउनुभएको छैन । सरकारले सिंहदरबारलाई आधुनिक र प्रविधिमैत्री प्रशासनिक केन्द्रका रूपमा विकास गर्ने रणनीति अनुसार यो कदम चालेको बुझिएको छ ।
