भाटभटेनीको व्यावसायिक आदर्श : विध्वंश, आगजनी र लुटपाटले थलिएको भए पनि कर्मचारीको तलब र दशैं बोनस रोक्दैनौं !

नेपालमा व्यवसाय विस्तार गर्दै अलग्गै पहिचान बनाएको भाटभटेनीले विध्वंश, आगजनी र लुटपाटले आफ्नो व्यवसाय थलिएको भए पनि कर्मचारीको तलब र दशैं बोनस प्रदान गर्ने भएको छ ।

भदौ २४ गते, मंगलबार आन्दोलनका क्रममा भाटभटेनी सुपरमार्केटका २८ मध्ये २१ वटा शाखामा क्षति भएको छ। भाटभटेनीका प्रतिनिधि पानु पौडेलका अनुसार यी शाखाहरूमा प्रदर्शनकारीले चोरी, तोडफोड र आगजनी गरेका थिए । १२ वटा शाखामा लुटपाटपछि आगो झोसिएको हो भने ९ वटामा तोडफोड र लुटपाट भएको थियो ।

यसअघि २०८१ चैत १५ मा दुर्गा प्रसाईंले नेतृत्व गरेको आन्दोलनमा पनि कोटेश्वरको भाटभटेनीमा तोडफोड र चोरी भएको थियो।

त्यो बेलाको भएको ८० लाख रूपैयाँको क्षति नै ठूलो थियो। तर अहिलेको क्षति अकल्पनीय भएको र व्यवसायीको मनोबलमाथि नै निर्मम प्रहार भएको कर्मचारीहरूले बताएका छन्।

कुन शाखामा कस्तो क्षति

भाटभटेनीका अनुसार उसले वार्षिक ३१ अर्ब रूपैयाँभन्दा बढीको व्यापार गरेर नाफा कमाइरहेको छ। तर त्यो नाफाको ठूलो हिस्सा सामाजिक उत्तरदायित्वमा खर्च गरिरहेको छ।

भाटभटेनी मात्रै होइन यसपालि आन्दोलनमा, धेरै रोजगारी दिने, ठूलो कारोबार गर्ने अधिकांश व्यावसायिक घराना निशानामा परेका छन्। चौधरी ग्रुप, आइएमई ग्रुप, गोल्छा ग्रुप, शंकर ग्रुप, बहुराष्ट्रिय कम्पनी सबैमा तोडफोड गरिनुका साथै धेरैमा आगो झोसिएको छ।